أحدث الأخبار المحلية والعالمية والفنية والسياسية والرياضية والاقتصادية وبرامج التوك شو





سخرية الفيس بوك من باسم يوسف اراجوز العلمانيين والليبراليين




ظاهرة المعارضة الضاحكة
-----------------------------
كابتن كابتن مالك فيه إيه ؟

ياعم اللي اسمه باسم يوسف ده خنقني مفيش وراه غير الاسلاميين وبس بيحاول يطلع أي اخطاء لناس محسوبين على التيار الاسلامي عشان يصور للناس ان الاسلاميين كلهم كدة ده غير اسلوبه اللي بقى كله ألفاظ خارجة وإساءة ازيد من الاول ... الواحد اتخنق من الاشكال دي

طيب اهدى ياعم بس متعملش في نفسك كدة ... تعالى هأقولك كلام كدة على السريع يمكن يريحك بس كمل للأخر

خلينا نتكلم الاول عن باسم يوسف :

أولا هوا شخصية فكاهية
ثانيا هوا اسلوبه لذيذ للناس اللي عايزة تضحك
ثالثا وراه طاقم اعداد عالي اصل مش باسم هوا اللي بيعد ولا هوا اللي بيألف هوا مجرد "مؤدي" وبس
رابعا باسم يوسف بيعتمد على حاجة مهمة اوي اللي هيا " التاريخ " .. باسم بيعتمد على مقتطفات من تاريخ بعض الاشخاص وبيحاول يصورهم انهم كان موالين لمبارك او حتى انهم كانوا ساكتين ايام مبارك واللي بيساعد باسم في كل ده ان هوا ملهوش تاريخ ... حضرتك كنت تعرف باسم قبل الثورة ؟؟ طيب كنت بتشوفه مثلا يصول ويجول في حملات لمعارضة مبارك ؟ طيب كان مثلا معتقل سياسي قبل كدة ؟ طيب كان احد الاعلاميين الاحرار في عصر مبارك وتم اقصائه ؟؟ فكر في الاسئلة دي اللي مش هتلاقي ليها اجابة اصلا لحد ما بتوع حركة " باسمون " يحضرولنا شوية ردود ومش بعيد يعملوا صفحة كان فين باسم قبل الثورة ^_^

وملحوظة كدة على السريع للناس اللي بتطلع تقول ده عميل ومتمول وتبع المخطط الصهيوني الامريكي احب اقولكم الاسلوب ده اتحرق في مليون فيلم قبل كدة بالعكس كلامكم ده هيخلي الناس تسمعه اكتر فبلاش جو 6 ابريل ممولة من الخارج والاخوان ممولين من قطر عشان بقى قديم اوي ... اللي عنده دليل يقدمة واللي معندهوش يسكت احسن .
--------------------------------------------------------------
تعالوا بقى نتكلم عن تأثير باسم على الناس :

أولا باسم هيكون تأثيره الكبير على الناس اللي متأثرة اصلا .. مش فاهم ؟ تعالى افهمك
انت راجل اصلا بتكره الاسلاميين اهو باسم بقى جابلك البرنامج اللي يخليك تضحك على الناس اللي انت اصلا بتكرههم يعني تأثير باسم السياسي هيكون على الناس اللي متأثرة اصلا

ثانيا باسم يوسف مفيد جدا للدكتور محمد مرسي عند عوام الناس ... برضه مش فاهم ؟ تعالى افهمك مرة كمان .... معظم حلقات باسم بتتكلم عن ديكتاتورية مرسي .. وتسلط مرسي ... وجبروت مرسي .. في حين ان حلقات باسم يوسف اصلا اكبر دليل على ان مرسي مش ديكتاتور زي ما هوا بيصوره وسمعتها بودني من شخص كان بيتفرج عليه وقال لو مرسي ديكتاتور كان زمانك دلوقتي في السجن زي ما مبارك كان بيعمل ... عرفتوا بقى ان باسم اصلا مفيد مش مضر ^_^

ملحوظة : باسم بيسخر من التيار الاسلامي من بعد الثورة وكان بيزود النقد اكتر في الفترات المهمة خصوصا وقت الانتخابات ومع ذلك الاسلاميين اخدوا اغلبية ( شعب وشورى ) و مرسي كسب في انتخابات الرئاسة وان شاء الله البقية تأتي .

ثالثا باسم مؤدي وبس ... يعني هوا اللي بيكون واجهة لطاقم عمل كبير بيحضر كل اللي بيتقال يعني فيه ناس كتير بتبقى كل وظيفتها قص ولزق في شوية صور وفيديوهات وهوا يطلع يقدمها للناس باسلوبه المميز ... طبعا بغض النظر عن ان حلقاته اصبح فيها كمية بذاءات لا توصف وده ممكن يكون سبب رئيسي ان الناس تنفر منه خصوصا في البيوت المحافظة حتى لو كانوا قليلين اوي
" الا انك بتلاقي كام بنت كدة كانوا بيطلعوا يقولوا احنا لا نحتمل اننا نتفرج على عبد الله بدر لما قال كلام سيء على إلهام شاهين ومع ذلك بيقعدوا يتفرجوا ويضحكوا على الالفاظ الجميلة اللي بيقولها باسم يوسف ... ايه يا ناس الكسوف ده ؟؟ ^_^ "

رابعا باسم اعلاميا ونفسيا بيقتل نفسه بنفسه لو استمر على نفس الاتجاه لانه ببساطه هيبقى صاحب جمهور محدد اللي هوا جمهور كارهي الاسلاميين وبس لانه بيتكلم في اتجاه واحد وطبعا انا فطست من الضحك لما قال انه انتقد القساوسة ( في 3 دقايق من حلقة من وسط 300 حلقة ) وقال انه انتقد حمدين والبرادعي ( في حلقات اصلا كانت عن كل مرشحين الرئاسة ) يعني مطلعش مثلا عمل شوية هولوكوست او لبس طقم بوذا او حتى طلع حاطط ايده في ايد كام واحد من الفلول واتصور معاهم
ولان ببساطة برضه الشخص العادي بيمل من النقد في اتجاه واحد بل بالعكس الشعب بتاعنا طيب اوي وربنا .... يعني كل ما بتشتم في حد هوا بيحبه اكتر ... اه وربنا ^_^

خامسا باسم يصلح كديكور للعرس الديموقراطي ( اللي هوا قلس عليه ) لان ببساطة نفس البرنامج اصلا بيتعمل في اكتر من دولة ومنهم امريكا على سبيل المثال ومع ذلك كان رؤساء امريكا بيتم انتخابهم مرتين متتاليتين من الشعب ... لان ببساطة انجازاتك هيا اللي هتتكلم ومحدش هينزل ينتخب غيرك لمجرد ان فيه واحد عامل برنامج ساخر عنك .

سادسا بيتم تلميع باسم كنوع من انواع المعارضة لان ببساطة اكتر حاجة بتوصل للشعب هيا الضحكه فباسم يوسف يعتبر كارت من كروت المعارضة ... زي ما الاخت الفاضلة سما المصري كارت من كروت المعارضة برضه .. يعني من الاخر كل واحد بيطلع يعارض بس بطريقته ^_^
---------------------------------------------------
طيب والحل ؟؟؟؟

الحل في ايه ياعم الحج هوا مفيش موضوع اصلا عشان نلاقيله حل بس عشان اريحك تعالى اقولك كام حاجة كدة ممكن تنفع في المواقف دي .... لو عايز ترد على باسم يوسف اعمل الاتي :

أولا لوعندك القدرة انك تعمل برنامج موازي ليه لنقد التيار الليبرالي والعلماني بأسلوب افضل منه اتفضل ( واظن هيبقى عندك كمية داتا لا تنتهي ) هما فضايحهم وفيديوهاتهم كتير... ايشي اعلاميين وايشي نخبة وايشي احزاب وايشي تصريحات وتسجيلات ولقاءات ومقالات ... يوووووووه الخير كتير
اهم حاجة ميكونش هدفك من البرنامج انك تطلع تنتقد باسم يوسف نفسه .. بالعكس ... ابسلوتلي
حاول تركز على التيار اللي هوا منتمي ليه وبيحبه مش عليه هوا شخصيا ... يعني زي ما هوا طلع بيصور ان المرشد هوا رئيس مصر ... انت لما تطلع تتكلم عن باسم يوسف حط صورة سويرس مثلا .
ويفضل ان اللي يطلع يقدم البرنامج يتوفر فيه الصفات القادمة ( خفة الدم طبعا – يكون في سن الشباب عشان يوصلهم اكتر – يكون متنوع مش صاحب رتم واحد – يكون تاريخه ناصع البياض وميكونش شخصية مشهورة عشان محدش يحاول يدعبس وراه على أي حوار فاكس يشوهه بيه ) وعلى العموم انا موجود وكل الصفات دي تنطبق عليا ^_^

ثانيا ممكن تطبق خطة 4-2-4 اللي هيا ( طنش – تعش – تنتعش ) لان ببساطة كلامك الكتير عنه هيخليه يكبر اكتر ويعند اكتر ويوصل للناس اكتر واكتر ... لو مش عاجبك متتفرجش عليه واشغل نفسك باللي يأثر في الناس اكتر من مليون برنامج ... الناس عايزين تغيير وانجازات ولو حققت الكلام ده مش هيفرق مع الناس مليون باسم يوسف بل بالعكس هيبقى في نظرهم مجرد ( كذاب كبير ) ومجرد كومبارس في فيلم عربي قديم وزي ما قلت هيبقى من كماليات الديموقراطية الاسلامية ^_^

اقعدوا بالعافية

Labels:



Leave A Comment:

Copyright © ميكسات عربية.
Powered by Blogger.